top of page

Bitter, bitter-soet

Ek het nou ekstra pakplek vir my handdoeke en

linne in die laaikas wat nou leeg staan

omdat daar nie meer Paw Patrol broekies en

Avengers hempies is wat dit volmaak nie.


Ek sit in die middag ná werk op die bank met my

bene heerlik voor my uitgestrek en binge watch

Grey's met 'n glas rooiwyn

omdat daar nie nou meer skerp elmbogies oral oor

my lyf kan klouter terwyl Power Rangers se tema lied my ore seermaak nie.


Ek het tyd om kreatiewe videos te maak

van kosbare oomblike wat ek deel met Johan

omdat vetterige vingertjies nie konstant meer my

foon kan anekseer om blurry fotos van Mamma en honde en die mooiste perongeluk-selfies te neem nie.


Ek kan met twee koppies rooibostee kamer toe stap

waar ons nou by die sagte lig van ons bedlampies

kan lê en lees

omdat 'n besige lyfie ons nie meer só moeg kan speel dat ons, baie gelukkig, wil uitpass die oomblik wat ons lywe aan die bed raak nie.


Ek kan weer voor sonopkoms in die oggend gaan gym

omdat daar nie meer 'n klein gesiggie is wat

deur-die-slaap vra dat ek asseblief nie moet gaan nie.


Ek kan weer afsprake na werk op my kalender maak

omdat klein ogies nie meer in die middag

opgewonde vir my wag om hom by die skool te kom

haal nie.


Ek kan ons kos- en yskaste vul met eksotiese bestanddele

omdat daar nie meer 'n magie is wat net honger gaan wees vir chips en kaastoasties nie.


Ek kan die skoon wasgoed vir dae op jou bed laat sit

omdat die dinosaurs op jou duvet vir baie lank baie stil gaan lê, terwyl die dinosaurs op jou kussingsloop heerlik in Spanje baljaar.


Ek kan gordyne hang en blinds uitkies in sagte skakerings wat pas by ons smaak

omdat alle kleur, vir nou, uit ons huis moes weggaan.


L

Comentarios


bottom of page